Bugun 5 mart kuni poytaxtimizdagi “International Hotel Tashkent” mehmonxonasi binosida kiberxavfsizlik masalalariga qaratilgan “Xavfsiz koʻprik” nomli forum oʻtkazildi. Forumning asosiy maqsadi – ishlab chiqaruvchilar va foydalanuvchilar oʻrtasida muloqot oʻrnatish, shu bilan birga axborot xavfsizligi uchun yangi tahdidlar boʻyicha mutaxassislar va umuman aholining xabardorligini oshirish, ularga qarshi kurashish boʻyicha samarali choralar ishlab chiqish.
Tadbir Oʻzbekiston Respublikasi Prezidenti huzuridagi Loyiha boshqaruvi milliy agentligi (LBMA) koʻmagida Mirzo Ulugʻbek Innovatsion Markazi tomonidan tashkil etildi.
Shu munosabat bilan mamlakatimizdagi yirik kompaniyalar, shuningdek qoʻshni davlatlar mutaxassislari axborotni muhofaza qilishning zamonaviy usullari, Oʻzbekistonda blokcheyn texnologiyasini amaliyotga tatbiq etish, oʻta muhim axborotlarni boshqarish tizimi va shu kabi koʻplab masalalar haqida soʻz yuritishdi. Xususan, forum ishtirokchilari maʼlumotlar qayta ishlanish tarzi, kiber jinoyatlarga qarshi kurashda biznes uchun qanday axborot texnologiyalari zarur, qanday yangi hujumlarni kutish mumkin kabi masalalarni muhokama qilishdi.
Boʻlib oʻtgan tadbirda E&Y, D:CODE, BePro, Cumulative Business Solutions, Ideal Green Light. Kompaniyalari, xalqaro tashkilotlar vakillari, jumladan BMTRD, Osiyo Taraqqiyot Banki, davlat organlari, axborot xavfsizligi boʻyicha direktorlar, AT- va AX- boʻlim boshliqlari, banklarning ixtisoslashgan mutaxassislari, xususiy sektor vakillari, Mirzo Ulugbek Innovation Center rezidentlari, OAV vakillari ishtirok etishdi.
Shuningdek seminarda Oʻzbekiston respublikasi axborotlashtirish va telekommunikatsiyalari sohasida nazorat boʻyicha Davlat inspeksiyasining“Texnik koʻmaklashish markazi” DUK ning yetakchi mutaxassislaridan Oʻktam Sobirov - “Milliy axborot xavfsizligi UzCERT nizolarini bartaraf etish xizmati tajribasi” nomli taqdimoti bilan ishtirok etib yigʻilganlarda katta qiziqish uygʻotdi.
