15-may kuni Toshkentdagi Inxa universitetida “Internetni boshqarish boʻyicha 4-Markaziy Osiyo forumi” ikki kunlik oʻz ishini boshladi.
Forum har yili Markaziy Osiyo mamlakatlari, MDH va Yevropadan 200 nafar ishtirokchini oʻzida birlashtiradigan Markaziy Osiyo mamlakatlarida Internetni boshqarish siyosati masalalarini muhokama qilish boʻyicha ochiq maydon hisoblanadi.
Bu yil forumning asosiy mavzusi Markaziy Osiyo imkoniyatlarini kengaytirishda Internetni rivojlantirish deb ataladi. Internetni boshqarish sohasi mutaxassislari, vazirliklar, aloqa agentliklari, huquq-tartibot organlari, shuningdek, xalqaro tashkilotlar va tijorat kompaniyalari, tadqiqot markazlari vakillari muhokamalarda ishtirok etmoqdalar, kiberxavfsizlik, Internet erkinligi va uni muvofiqlashtirish, DNS tarmogʻini rivojlantirish hamda Internetdan foydalanish, shuningdek, Internetni boshqarish masalasida global va milliy yondashuvlar borasidagi muammolarni qanday hal etish yuzasidan ilgʻor tajribalar bilan oʻrtoqlashmoqdalar.
Tadbirda Oʻzbekiston respublikasi axborotlashtirish va kommunikatsiyalar sohasida nazorat boʻyicha davlat inspeksiyasi “Texnik koʻmaklashish markazi” DUK mutaxassisi, Internet tarmogʻida milliy segment xavfsizligi boshqarmasi/CERT boshqarma boshligʻi Aʼzam Gafurov CERT xizmatlari: dolzarbligi va istiqbollari mavzusidagi taqdimoti bilan ishtirok etdi. Tadbir qatnashchilari oʻzlarini qiziqtirgan savollariga yetarlicha javoblar olib fikr almashdilar.
Internetni boshqarish boʻyicha 4-Markaziy Osiyo forumi Oʻzbekistonda ushbu yoʻnalishdagi birinchi forum hisoblanadi. Forum bugun 16-may kuni oʻz ishini yakunlaydi.
