Bugun, 6 sentyabr kuni Toshkentda Shanxay hamkorlik tashkilotining axborot xavfsizligi boʼyicha ilmiy-ekspert forumi boʼlib oʼtdi.
Tadbir Oʼzbekiston Respublikasi Prezidenti huzuridagi Strategik va mintaqalararo tadqiqotlar instituti tomonidan Oʼzbekiston Respublikasi Аxborot texnologiyalari va kommunikatsiyalarni rivojlantirish vazirligi hamda ShHT Mintaqaviy aksilterror tuzilmasi Ijroiya qoʼmitasi bilan hamkorlikda oʼtkazilmoqda.
Xorijiy ishtirokchilarni onlayn ulash orqali gibrid formatda tashkil etilayotgan axborot xavfsizligi masalalari boʼyicha muloqotda ShHTga aʼzo davlatlarning tegishli vazirlik, idoralari, ilmiy-akademik va tahliliy doiralari vakillaridan iborat 30 nafardan ziyod yetakchi ekspertlar jamlandi.
Ishtirokchilarning nufuzli tarkibi raqamlashtirish sohasidagi soʼnggi tendentsiyalar va yutuqlarni muhokama qilish, shuningdek ShHT makonida inson huquqi va huquq ustuvorligini taʼminlash sharoitida axborot va kiber xavfsizlik sohasidagi tahdidlarga qarshi kurashish boʼyicha ilgʼor milliy tajribani taqdim etish imkonini berdi.
Mazkur forumni oʼtkazish tashabbusi Oʼzbekiston Respublikasi Prezidenti Shavkat Mirziyoev tomonidan 2021 yil 17 sentyabr kuni ShHTning Dushanbe sammitida ilgari surilgan edi.
Ushbu tadbirda “Kiberxavfsizlik markazi” DUK direktori Mirzaev Olimjon Nomazovich ham “Kiberxavfsizlik: axborot infratuzilmasi obyektlarini texnik muhofaza qilish” ma’ruzasi bilan so‘zga chiqdi.
