“Kiberxavfsizlik markazi” davlat unitar korxonasi tomonidan xorijiy davlatlarning CERT xizmatlari, kiberxavfsizlik sohasidagi yetakchi davlat va nodavlat tashkilotlari bilan hamkorlik aloqalari o‘rnatilgan va doimiy tarzda sohaning jahon tajribasi o‘rganib boriladi.
Joriy yilning fevral oyida, Markaz mutaxassislari tomonidan olib borilgan say-harakatlar va uzoq yillik hamkorlikdan so‘ng, UZCERT xizmati dunyoda kiberxavfsizlik sohasida yetakchi tashkilotlardan biri bo‘lgan “FIRST” xalqaro forumining to‘laqonlik a’zosi maqomiga erishilganligini ma’lum qilamiz.
“FIRST” – kiberxavfsizlik hodisalariga chora ko‘rish va kiberxavfsizlik guruhlarining xalqaro tashkiloti bo‘lib, “FIRST”ning asosiy vazifasi dunyoda kiberxavfsizlik tahdidlariga qarshi kurashish samaradorligini va xalqaro hamkorlikni rivojlantirishdir.
Ta’kidlash joizki, “FIRST” akkreditatsiyasidan o‘tish uchun UZCERT xizmati bir qator talab va mezonlarga mos kelishi, shuningdek, maxsus komissiya tekshiruvidan o‘tishi lozim edi. Mezonlar orasida: tezkor choralar ko‘rish, hodisalar haqida ma’lumot to‘plash sifati, mijozlardan arizalarni qabul qilish va qayta ishlash xavfsizligi, shuningdek, boshqa “FIRST” a’zolarining homiyligi va kafolati talab etiladi. Ushbu jarayonda, UZCERT jamoasiga Yaponiyaning “JPCERT/CC” va Latviyaning CERT-LV tashkilotlari homiylik qildilar.
