So‘nggi yillarda yurtimizda kiberxavfsizlik sohasiga katta e’tibor qaratilmoqda. Internet foyndalanuvchilari uchun mavjud tahdidlardan himoya qilishda “Kiberxavfsizlik markazi” qulay platforma vazifasini o‘tamoqda.
Yurtimizda unib-o‘sib kelayotgan yoshlarni har tomonlama qo‘llab-quvvatlash davlatimizning ustuvor vazifasi sanaladi. Kiberxavfsizlik sohasiga qiziquvchan yosh avlod uchun “Kiberxavfsizlik markazi” qoshida “Kiberxavfsizlik klubi” tashkil etildi.
Ma’lumot o‘rnida, “Kiberxavfsizlik klubi” sohaga qiziquvchi, ilg‘or yoshlarni axborot va kiberxavfsizlikni ta’minlash sohasida tajriba almashishlari uchun maydon yaratish, axborot xavfsizligi insidentlarini monitoring qilish va ularga javob berish bo‘yicha xorijiy mamlakatlarning ilg‘or tajribalarini o‘rganish hamda kibermakon tuzilishi va uning ishlash tamoyillari, Internet foydalanuvchilari uchun mavjud tahdidlar, axborot etikasi qoidalari va normalari haqida tushunchalarini shakllantirish maqsadida tashkil etildi.
Klubning mavjud a’zolarini rag‘batlantirish va ilg‘or xorijiy tajribani o‘rgatish maqsadida, “Kiberxavfsizlik markazi” tomonidan joriy yilning 24-29-iyul kunlari Boku (Ozarbayjon) shahrida bo‘lib o‘tadigan “Cyber Summer School – 2023”da ishtirok etish uchun yuborildi.
Aytish kerak, “Cyber Summer School” yozgi maktabining ko‘lami va xalqaro ahamiyati yil sayin ortib bormoqda. Malumot uchun, 30-iyulga qadar davom etadigan yozgi maktabda Ozarbayjon, Isroil va Turkiyadan, shuningdek, Turkiy davlatlar tashkilotiga a’zo Qozog‘iston, O‘zbekiston, Qirg‘izistondan o‘smirlar, jami 125 nafar ishtirokchi qatnashmoqda.
“Cyber Summer School-2023” yozgi maktabining oʻquv va amaliy seminarlari Ozarbayjon, Isroil va Turkiya soha mutaxassislari tomonidan oʻtkazilmoqda. Dastur doirasida 20 nafar mutaxassislar tomonidan kiberxavfsizlikning turli jihatlari bo‘yicha 20 dan ortiq o‘quv-amaliy seminarlar o‘tkaziladi. Tadbir so‘ngida yozgi maktab ishtirokchilari o‘rtasida bilimlar bellashuvi (CTF) o‘tkazilishi rejalashtirilgan.
