O‘zbekiston Respublikasi Oliy Majlisi Senatida “Elektron parlament” loyihasi asosida axborotlarni himoya qilish yuzasidan joriy yilning 13 may kuni senat binosida axborot va kiberxavfsizlik bo‘yicha seminar o‘tkazildi.
Mazkur seminarda “Kiberxavfsizlik markazi” DUK direktori o‘rinbosari Gafurov Sharifjon Raximovich Bugungi kunda Markaz tomonidan Kiberxavfsizlikni ta’minlash sohasida olib borilayotgan ishlar hamda davlat va xo‘jalik boshqaruvi organlarida axborot xavfsizligini ta’minlashdagi muammolar va ularning yechimlari, axborot xavfsizligiga bo‘ladigan tahdidlar va ularga qarshi kurashish usullari yuzasidan tinglovchilarga ma’lumot berdi.
Seminar davomida Idoralararo hamkorlik bo‘limi bosh mutaxassisi Husenov Farrux Homidovich “Kiberxavfsizlik to‘g‘risida”gi O‘zbekiston Respublikasi qonunining mohiyati” va yetakchi mutaxassisi Ergashev Izzatilla Xayrulla o‘g‘li “Axborotni himoya qilishning asoslari” mavzusida maʼruzachi sifatida ishtirok etdilar.
Tadbirda Senat devoni xodimlarining bilim va ko‘nikmalarini yanada oshirish maqsadida axborotlashgan zamonda axborot kommunikatsiya texnologiyalariga ehtiyoj juda yuqori darajadaligi, bunday tezkor axborot almashinuvi davrida axborot xavfsizligini ta’minlash, turli tahdid va hodisalarni oldini olish dolzarb ahamiyat kasb etishi yuzasidan keng tushunchalar berildi.
Seminar yakunida ishtirokchilar o‘zlarini qiziqtirgan savollariga javob oldilar.
