O‘zbekiston Respublikasi - bugungi kunda iqtisodiyoti eng jadal rivojlanayotgan mamlakatlardan biridir. Uchinchi xalqaro Plas-Forum aynan shu yerda, Toshkentda o‘tkazilgani bejizga emas. “Банки и Ритейл. Цифровая трансформация и взаимодействие” Plas-Forumining asosiy maqsadi - O‘zbekiston Respublikasi va iqtisodiyotini rivojlantirishga ko‘maklashishdir.
Markaziy Osiyodagi eng yirik Forumda 21 mamlakatdan 1200 dan ortiq ishtirokchilar ishtirok etdi, shuningdek, 110 dan ortiq malakali ma’ruzachilar, shu jumladan bank va moliya sohasi mutaxassislari, tartibga soluvchi organlar, IT-sohasi, axborot va kiberxavfsizlik sohasi vakillari so‘zga chiqdilar. Mazkur tadbir O‘zbekiston Respublikasida innovatsiyalar va istiqbolli xalqaro loyihalarni rivojlantirishga xizmat qiladi.
Raqamli iqtisodiyotni shakllantirish va rivojlantirish jarayonida iqtisodiy faoliyat sub‘ektlari axborot va kiberxavfsizlik, shuningdek, axborotni kiberhimoya qilish muammolariga bevosita duch kelmoqdalar. Moliyaviy-iqtisodiy sohada kiberjinoyatlar darajasining yuqori-darajada oshishi davlat xavfsizligiga ta’sir ehtimolini oshiradi hamda axborot infratuzilmasi obyektlariga jiddiy zarar yetkazishi mumkin. Shu bilan birga, jamiyatning barcha sohalarida kiberxavfsizlikni ta’minlash omillarini aniqlash dolzarbdir. Kiberxavfsizlik - ijtimoiy shakllanishning boshqa sohalariga nisbatan, fan sifatida yangi o‘rganish sohasi hisoblanadi. Shu munosabat bilan, iqtisodiy sohani kiberhimoyalash maqsadida yuzaga kelayotgan tahdidlarga qarshi kurashishning real mexanizmlarini ishlab chiqish hamda kelajakda aniq harakatlar strategiyasini shakllantirish muhim ahamiyatga ega.
2023-yil 21-22-iyun kunlari Toshkentning “International Hotel Tashkent” mehmonxonasida bo‘lib o‘tgan, “Банки и Ритейл. Цифровая трансформация и взаимодействие” uchinchi Plas-Forumida “Kiberxavfsizlik markazi” DUK Apparat vositalarining sinov laboratoriyasi boshlig‘i Aysayev Iskandar Muzaffarovich “Kibermakonda kiberxavfsizlikni ta’minlash muammolari” mavzusidagi taqdimoti bilan ishtirok etdi.
Ma’ruza mobaynida I.M. Aysayev kibermakonda kiberxavfsizlikni ta’minlashning 4 ta eng asosiy jihatiga e’tiborni qaratdi.
“Ta’kidlash joizki, kiberhujumga - nafaqat jismoniy shaxslar, balki tashkilotlar va davlatlar ham uchrashi mumkin. Kiberhujumlarni aniqlash va to‘xtatish, shuningdek ularning tashkilotchilarini topish qiyin va kiberhujum - turli Qonunchilik va yurisdiktsiyalarga bo‘ysunadi. Bundan tashqari, IT-texnologiyalarining rivojlanish darajasi kibertahdidlarga xabardorlik va tayyorgarlik darajasiga mos kelmaydi, murakkab parollardan foydalanishni istamaslikdan tortib antivirus dasturlaridan foydalana olmaslikgacha borib taqaladi. To‘rtinchi muammo, kiberxavfsizlik sohasida yuqori malakali mutaxassislarning yetishmasligi hisoblanadi”.
Shu o‘rinda I.M. Aysaev kiberxavfsizlik - bugungi kunda millionlab insonlar, tashkilotlar va davlatlarning manfaatlari va huquqlariga ta’sir ko‘rsatadigan eng dolzarb va murakkab muammolardan biri ekanligini yana bir bor ta’kidladi. Ushbu muammoni hal qilish - keng qamrovli va tizimli yondashuvni, shuningdek, kiberhujumning barcha ishtirokchilari o‘rtasida hamkorlik va muvofiqlashtirishni talab qiladi.
