“Киберхавфсизлик маркази” ДУК O`z DSt ISO/IEC 17025 ва O`z DSt ISO/IEC 17065 давлат стандартларига мувофиқлиги борасида аудиторлик текширувидан муваффақиятли ўтди

Жорий йилнинг 2 октябрь куни “Киберхавфсизлик маркази” Давлат унитар корхонасида Сертификатлаш органи ва Ахборот хавфсизлиги воситаларини тадқиқ қилиш лабораториясининг O`z DSt ISO/IEC 17025 ва O`z DSt ISO/IEC 17065 давлат стандартлари талабларига мувофиқлиги бўйича режали аудит текшируви ўтказилди.
Аудит текшируви “Аккредитация маркази” ДУК Инспекция назорати департаменти бошлиғи О.Шарипов бошчилигидаги “Аккредитация маркази” ДУК вакили Д. Гафуров, “UNICON.UZ” ДУК вакиллари Ж.Юсупов ҳамда Э.Хайдаралиев таркибидаги комиссия томонидан амалга оширилди.
2019-2020 йиллар мобайнида “Киберхавфсизлик маркази” ДУК томонидан Ўзбекистон Республикаси Ҳукуматининг тегишли қарорларини бажариш мақсадида ишлаб чиқилган ва Ўзбекистон иқтисодиётини рақамлаштиришни жадаллаштиришга мўлжалланган 50 дан ортиқ дастурий маҳсулотлар ахборот хавфсизлиги талабларига мувофиқлиги сертификатланди.
“Аккредитация маркази” ДУК комиссияси “Киберхавфсизлик маркази” ДУК бўлинмаларининг 2019-2020 йиллардаги сертификатлаштириш бўйича фаолияти натижалари билан ҳар томонлама танишиб (жами 56та фаолият йўналиши текширилди), уни Ўзбекистон Республикаси Миллий сертификатлаш тизимининг меъёрий ҳужжатларининг барча талабларига жавоб беришини тасдиқлашди.
Сертификатлаш органи бошлиғи Д.А. Файзуллаев, унинг ходимлари Е.Петрова, Л. Нармухамедов, А. Дурель, ҳамда Ахборот хавфсизлиги воситаларини тадқиқ қилиш лабораториясининг бошлиғи Х.Б.Рустамов, унинг ходимлари О. Бахронов, П. Чесноков, П. Кирюхин ва А. Усаровлар “Аккредитация маркази” ДУК комиссияси билан фаол алоқада бўлиб, замонавий синов ускуналаридан фойдаланган ҳолда энг мураккаб дастурий таъминот тизимларини синовдан ўтказиш бўйича билим ва кўникмаларни муваффақиятли намойиш этдилар.
“Киберхавфсизлик маркази” ДУК раҳбарияти номидан Марказ директори Д.Е.Чиченков ва директорнинг биринчи ўринбосари А.А. Хамзинлар “Аккредитация маркази” ДУК комиссиясига олиб борилган иши учун миннатдорчилик билдириб, “Аккредитация маркази” ДУК экспертларининг ўзаро мулоқоти ва касбий тайёргарлигининг юқори даражасини, шунингдек уларнинг фаолиятини Ўзбекистон Республикасида олиб борилаётган сертификатлаштириш ишлари сифатини янада ошириш борасида катта аҳамиятга эга эканлигини таъкидлаб ўтишди.