“JobFest 2022” – бўш иш ўринлари ярмаркасининг асосий мақсади Ўзбекистон ва хориждаги барча илғор ташкилотларни, шунингдек, IT йўналиши мавжуд бўлган барча олий ўқув юртларининг битирувчилари ва талабаларини бир жойга жамлаш эди.
Тадбирда EPAM, CLICK, Олмалиқ KMK, “Ўзбекнефтгаз”, “Ўзбектелеком”, “Киберхавфсизлик маркази” DUK, “АКFА group”, “Huawei”, “Vivo”, “Express 24”, “New Max Tech”, “Ўзбекистон почтаси” каби ташкилотлар вакиллари, Ўзбекистон етакчи университетлари, банклар ва бошқа ташкилотлар иштирок этди.
Бўш иш ўринлари ярмаркаси доирасида “Киберхавфсизлик маркази” ДУК вакиллари иштирокчиларни Марказ фаолияти билан таништиришди, бўш иш ўринлари ва номзодларга қўйиладиган талаблар, ишга жойлашиш учун ариза топшириш жараёнлари, Марказнинг очиқ ресурслари ҳақида маълумот беришди, шунингдек, киберхавфсизлик соҳасида қизиқиш уйғотадиган масалалар муҳокама қилинди. Номзодларнинг билимини баҳолаш учун норасмий суҳбатлар ўтказилди. Ярмарка вакиллари ва иштирокчиларининг қизиқиши ва фаол иштирокини уйғотган масалалардан бири Марказнинг интерактив тести (Quiz test) бўлди.
Бундан ташқари, тадбир давомида қуйидаги иштирокчилар маъруза қилдилар:
Itransition компаниясининг бош муҳандиси Павел Лебедев «Техникага оид суҳбатдан қандай ўтиш керак» мавзусида семинар ўтказди;
EPAM компаниясида Senior Systems Engineer вазифасида ишловчи Руслан Салихов "DevOps ва у нима иш билан шуғулланади" мавзусида тақдимот ўтказди;
Huawei компаниясида Wireless Network Design Engineer лавозимида ишловчи Джавдат Хабибуллин «Road to Mobile 2030» мавзусида сўзга чиқди;
IT & Cloud product manager вазифасидаги Жавлон Нурматов Building Data Infrastructure for the Intelligent World мавзусида маъруза қилди;
World of Warships лойиҳасида Tech Team Lead вазифасида фаолият кўрсатаётган Михаил Попов «GameDev да фаолият юритиш: орзулар рўёбга чиққанда» мавзуси билан сўзга чиқди;
Чиқишлар якунида Lesta компаниясида HR Director лавозимида ишлаётган Анна Посаженникова “Bad Advice: GameDev га қандай жойлашиш мумкин” мавзусида маъруза қилди.
Сўзга чиққанларнинг тақдимотлари талабаларда катта қизиқиш уйғотиб, улар маърузачиларга ўз саволлари билан мурожаат қилиш ва керакли маслаҳатлар олиш имкониятига эга бўлдилар.
Ярмаркада пойтахтдаги турли олий ўқув юртларининг 600 дан ортиқ талабаси ҳамда Ўзбекистоннинг 50 дан ортиқ энг йирик компаниялари вакиллари иштирок этдилар.
